| PEDOMAN ULAON UNJUK |
Prosesi Ulaon Adat Siulaon di Unjuk
Ditulis oleh Tim Adat PSDBJ
Godang do prosesi dohot panghobasion na hurang persiapan mambahen lambat sada ulaon. Ala ni ima a porlu direncahononhon hasuhuton mar ompu-ompu di tingki tonggo saripe aha siulaon jala ise mangulahon. Ingkon antusan ni Protokol do i sude ala nasida do do uluan ni ulaon.
Molo tung adong pe na so direncanahon alai porlu diulahon (hal-hal mendadak), ingkon malo ma Protokol dohot Parsinabul manghobasi (mengatasi) di bagasan dame ni roha, tarlumobi di jolo ni marga na asing, unang adong perdebatan di jolo ni natorop.
1. Urutan ni Ulaon
Onma urutan na somal di ulaon unjuk:
- Prosesi Mamasuhi Gedung, (Alap/Taruhon Jual)
- Manjalo Haroro ni Hula-hula dohot sude uduranna
- Pasahat Tudu2 ni Sipanganon, pasahat Dengke
- Martangiang laho mangan, Marsipanganon
- Padalan Sulang-sulang
- Marhata Jambar-Parjambaran dohot Padalan Jambar
- Papungu Tumpak
- Mangarade laho tu Panghataion
- Manghatai – Pinggan Panungkunan
- Pasahat Sinamot, Suhi ni Ampang Na Opat dohot Panandaion
- Pasahat Pinggan Panganan
- Pasahat Tintin Marangkup
- Marhata Ulos / Pasahat Ulos namarhadohoan
- Pasahat Ulos Natinonun Sadari
- Ulos Holong sian Parboru dohot sian Hula-hulana
- Ulos Holong sian Hula-hula ni Paranak
- Mangujungi Ulaon / marhata sigabe-gabe dohot mangampu
- Padalan Olop-olop
- Tangiang Pangujungi
2. Panghobasi (Petugas Adat)
Pinangido ma tu na marompu-ompu manang Horong asa angka naung mampu ma nian tapatujolo gabe panghobasi di ulaon adat. Unang be na marsiajar disi, unang leas roha ni marga na asing i mangida marganta (Simamora Debataraja). Jala unang marganti-ganti halakna protokol di sada ulaon, sahalak ma, asa unang gabe masisorohon hatana be. Tung adong pe na mendampingi protokol, holan sebagai asisten ma i, unang gabe sai dohot maniop/manggora sian mik.
Pintor tarida do denggan, lancar mardalan ulaon i, molo angka naung somal mangulahon angka naung pinatujolo i. Lambok begeon panghataionna, denggan jala uli angka taisina. Jala idaon ni natorop pe denggan, talumobi pihak bariba-an manang tondong i, sai songon na marsahala, gabe hormat nasida, lam marsangap ma ompunta i, marganta i.
Angka Petugas/Panghobasi :
- Protokol/Siungkap Hata, dohot asistenna.
- Parsinabul/Raja Parhata.
- Kordinator/Penanggung jawab ni ulaon i sian Ompu na saripe i, naung mangantusi dalan ni paradaton (kord. Adat) dohot Ketua ni Ompu i.
- Sijalo Tamue dohot Horong ni sude hula-hula di pintu jolo, dohot petugas di hundulan (dibagas gedung).
- Kordinator ni Parhobas, mamonitor parhobas ni katering, dengke ni hula-hula, dohot angka na asing.
- Sitiop amplop ulak ni tandok dohot ulak ni dengke.
- Kordinator ni sijalo boras.
- Petugas tangiang marsipanganon.
- Boru parlopes
- Angka na pasahat/manajalo Panandaion/Ulos 11.
- Silompit ulos (porlu molo posisi sebagai Paranak)
- Dohot angka na asing dope.
3. Siparadeon di Mata ni Ulaon
Kelengkapan ni angka haporluan on pe sangat menentukan uli ni acara i mardalan. Nungan ingkon diparade hian angka kelengkapan ni pesta, pantang do molo apala di mata ni pesta, tarsongon persiapan ni pinggan panganan na laho pasahaton tu hula-hula, ro di angka suhi ni ampang naopat, panandaion. Petugas na pasahathon manang na manjalo pe nunga ingkon diririt hian. Alana, molo lelet sian mulana, lam rundut ma tu pudi, gabe hurang uli sada ulaon.
Denggan ma dipersiaphon marjojor sian mulai ulak ni tandok, ulak ni dengke, sahat tu piso2 ni hula2 na mangulosi annon di ujung ni ulaon, manang pasituak natonggi.
Tugas ni Protokol do mamareso persiapan ni angka on sandorang so dimulai ulaon, asa sanga dipasingkop molo tung adong dope na hurang.
Songon i nang Buku Panduan sitiopon ni Petugas, unang asal dibahen, ingkondo terencana secara rinci dan akurat, unang gabe godang coretan manang koreksian.
Na mangantusi ma nian na mambahen buku panduan, manang jolo dikoreksi Tim Adat ni ompu i asa uli.
Catatan: Adong do standard Panduan ni ulaon adat di hita PSDBJ, lengkap do i. Holan tinggal mangido do i tu Tim Adat.
Angka Siparadeon haporluan di gedung :
- Ulak ni Tandok dohot Ulak ni dengke (di amplop)
- Hepeng ni Pinggan Panungkunan (Paranak) dohot napuranna
- Panggohi ni Sinamot (di piring)
- Amplop tu Suhi ni Ampang Na Opat
- Pinggan Panganan tu sude Hula-hula (Parboru) ditingki pasahat Upa Tulang
- Hepeng Panandaion (di amplop), ingkon sesuai tu daftar na sian Parboru
- Hepeng Pinggan Panganan tu Dongantubu (Parboru)
- Hepeng Tintin Marangkup sian Parboru dohot sian Paranak
- Hepeng Pinggan Panganan tu sude Hula-hula (Paranak)
- Hepeng di amplop, Ulos Tinonun sadari (Paranak)
- Hepeng Olop-olop (diatas piring)
- Pasituak Natonggi tu Parboru
- Hamauliateon tu angka nanaeng silehonon
- Ampang inganan ni Tumpak (paket gedung)
- Buku Panduan, lengkap dohot angka goar ni namanghobasi dohot tugas masing-masing (minimal 4 buku)
- Dohot angka na asing, cadangan atik adong na mendadak porlu
Angkup ni i, naeng ma nian sada kordinasi sude, unang sanga marsoal manang masibaen nabinotona be idaon di loloan natorop.
On ma na umporlu tugas ni Kordinator adat ni ompu i.
Diedit tanpa mengubah isi (admin_paradaton)